विशेष सम्पादकीय
पञ्चायती निरंकुशताको रावण किल्ला होस् वा तत्कालीन राजा ज्ञानेन्द्रको “कू” पछिको तानाशाही सत्ताको पर्खाल– त्यसलाई भत्काउन कलम र क्यामरा बोकेका हामी पत्रकारहरु अग्रिम मोर्चामा थियौं । अहिले लोकतान्त्रिक गणतन्त्रलाई जोगाउन पनि हामी कलम र क्यामरा बोकेर अग्रभागमा उभिदा जिउँदै जल्नु परेको छ ।
पत्रकार सुरेश रजक क्यामरा लिएर लोकतान्त्रिक गणतन्त्र , खुला समाज र प्रेस स्वतन्त्रताको रक्षामा उभिएका थिए । उनी कलमका सिपाही थिए । मसानघाटबाट निरंकुशताको प्रेत जगाएर लोकतान्त्रिक गणतन्त्रको घाँटी निमोठ्ने र नेपाली समाजलाई सामन्तवादी युगतर्फ फर्काउने अतातायी तथा अविवेकी भिडले वितण्डा मच्चायो । लोकतन्त्रको रक्षाका लागि क्यामरा बोकेर समाजलाई उज्यालो बोध गराउने सुरेश रजकलाई जिउँदै जलायो ।
निरंकुशता, तानाशाही व्यवस्था र सामन्तवादका पक्षपोषकहरुलाई थाहा छ प्रेस स्वतन्त्र रहुन्जेल लोकतान्त्रिक गणतन्त्रलाई क्षति पु¥याउन सकिदैन । समाजलाई अन्धाकर युगमा फर्काउन सकिदैन । क्याम्रा नफुटाई र कलम नभाँची निरंकुश राजतन्त्र फर्किदैन । त्यसकारण उन्मादी भिडले पहिलो आक्रमण नै सुरेश रजकमाथि गरेका हुन् ।
राजनीतिक अभिष्ट पूरा गर्ने कुनै पनि आन्दोलन शान्तिपूर्ण हुनुपर्छ । मानिसलाई जिउँदै जलाउने , तोडफोड, आगजनी र लुटपाट राजनीतिक आन्दोलनको हिस्सा मान्न सकिदैन । सभ्य समाजलाई त्यो कदापी स्वीकार्य हुँदैन । राज्य संयन्त्रले पनि यस्ता आतातायी हिंसालाई नियन्त्रण गरी शान्ति र सुव्यवस्था कायम गर्न कुनै कसर बाँकी राख्नु हुँदैन । यो राजनीतिक आन्दोलन होइन विशुद्ध आपराधिक र आतंकी हमला हो ।
पत्रकार सुरेश रजक माथिको आक्रमण र उनको पाशविक हत्याले राजावादीहरुले प्रेसमाथि अंकुश र नियन्त्रण लगाउन खोजेको प्रष्ट हुन्छ । लोकतान्त्रिक गणतन्त्रको रक्षामा अग्रपंक्तिमा भिएको र खुला समाजको अभ्यासका हिमायति बनेको नेपाली प्रेसलाई नियन्त्रणमा नलिई राजावादीहरुको उद्देश्य पूरा नहुने देखेर सुरेश रजकमाथि जानाजान गरिएको आक्रमण हो । यसको जति निन्दा गरे पनि कम हुन्छ ।
नेपाली प्रेस जगत लोकतान्त्रिक गणतन्त्र , प्रेस स्वतन्त्रता र खुला समाजको रक्षाका लागि अडिग रहने छ । हजारौं सुरेश रजकहरु छन् यहाँ । एउटा सुरेश रजकलाई जिउँदै जलाएर निरंकुशता लाद्ने दिवास्वप्न कहिल्यै पूरा हुँदैन ।
कलमका निर्भिक,अजेय, वीर सिपाही सुरेश – लाख लाख नमन तथा भिजेका हाम्रा नयनहरुको श्रद्धाञ्जली छ । हामी तपाईँले वरण गर्नुभएको सहासिक सहादतलाई नबिर्सिकन प्रेस स्वतन्त्रताको रक्षामा डटिरहने छौं ।
