सिरहा । औरही गाउँपालिका ५ मा क्याम्पस सञ्चालन गर्ने भन्दै आयोजना गर्न लागेको महायज्ञका नाममा ठूलो रकम उठेको छ । तर उक्त रकम चन्दा उठाउनेले गोजीमै राख्ने गरेको पाइएको छ ।
चन्दामा उठेको रकम राख्न एनएमबी बैंक औरही शाखामा खाता खोलेको छ । खाता गाउँपालिका अध्यक्ष शिवजी यादव र जनमतका नेता दिलिप यादवको नाममा छ । तर उक्त खातामा अहिलेसम्म रकम जम्मा गरिएको छ ।
महायज्ञको नाममा करिब १५ दिनदेखि चन्दा संकलन गरिदैछ । गाउँपालिका अध्यक्ष शिवजी यादवले करिब १५ लाख चन्दा संकलन भएको स्वीकारे । तर बैंकमा रकम जम्मा नगरिएकाले अनियमितता हुने स्थानीयको आशंका छ ।
एनएमबी बैंक औरही शाखाका म्यानेजर रविन्द्र यादवले शिवजी र दिलिपको नाममा खाता खोलिएको तर उक्त खातामा अहिलेसम्म रकम जम्मा नभएको पुष्टि गरे । उनले भने, ‘दुई जनाको व्यक्तिगत बचत खाता रहेको छ । त्यसैले रकम जम्मा भएमा कति जम्मा भएको कुरा भन्न मिल्दैन । अहिले रकम नै जम्मा भएको छैन ।’
महायज्ञका लागि समिति बनाइएको छ । तर गाउँपालिका अध्यक्ष र जनमतका नेता दिलिपले कति रकम उठाएकोबारे समितिमा रहेको कसैलाई थाहा छैन ।
गाउँपालिका अध्यक्ष र जनमतका नेता दिलिपले चन्दा उठाउन जाने बेलामा कसैलाई सोधखोज नगर्ने गरेकाले पनि उनीहरु रकम अनियमितता गर्ने शंका बढेको छ ।
