राहुल राय, सिरहा
गत फागुन २९ गते हराएकी १३ वर्षिय गुलशना खातुनको शव बोरामा बेरेर गाडिएको अवस्थामा फेला परेको छ । गोलबजार नगरपालिका ९ गोविन्दपुर गाउँकी बालिका गुलशना गत २९ गते फागुन बिहान ९ बजे घर बाहिर निस्केकी थिइन् । त्यसपछि उनी फर्किनन् ।
आज बिहान गोठालाहरु झाडी बुट्यान छेउछाउबाट उग्रिगन्ध चलेको गाउँमा आएर बताए पछि स्थानीयलाई इलाका प्रहरी कार्यालय मिर्चैलाई खबर गरेका थिए । गोलबजार ९ का पूर्व वडाध्यक्ष रामपुकार कामतीले भने , “एकातिर गाउँमा बालिका हराइरहेको खबर डढेलो झैं फैलिएको थियो । अर्कोतिर वनमारा झाडीभित्रबाट लास कुहिएको गन्ध आएपछि गाउँमा आशंका जाग्यो । दुर्भाग्यवश आशंका सत्यमा परिणत भयो । १३ वर्षिय गुलशना बोरामा बेरिएर खाडल भित्र मृत अवस्थामा फेला परिन् ।
घटनास्थल पुगेको प्रहरीले घुर्मी खोला किनारमा तीन फिट खनेपछि जुटको बोरामा बेरिएको बालिकाको शब फेला परेको प्रहरी उपरीक्षक सन्त बहादुर बाखुले जानकारी दिएका छन् । उनले भने लास पुरै कुहिएर चिन्न नसकिने अवस्थामा छ । अपराधिले लास छिटो गलोस् भनेर खाडलमा नुन हालेर शव परेको भेटिएको छ । कपडा र बाँकी रहेको शरीरको आकृतिबाट हराइरहेकी बालिका नै हुनुपर्छ भन्ने अनुमान लगाइएको छ । प्रहरीले बालिकाको शव पोष्टमार्टमका लागि सिरहा अस्पतालमा पठाउने तयारी गरेको छ ।
फागुन २९ गते हराएकी गुलशनाको खोजी गरिदिन उनकी आमा जाहेदा खातुनले इलाका प्रहरी कार्यालय मिर्चैयामा गत चैत १ गते निवेदन दिएकी थिइन् । ७ दिन बितिसक्दा पनि छोरीको अत्तोपत्तो नलागे पछि अत्तालिएकी जाहेदाले पत्रकार बोलाएर लेखिदिन आग्रह गरेकी थिइन् । खातुनले प्रहरीले हराएकी छोरीको खोजी गर्न उदासिनता देखाएको आरोप लगाएकी थिइन् ।
गत चैत ६ गते इलाका प्रहरी कार्यालय मिर्चैयाका प्रहरी नायव उपरीक्षक बाखुसँग गुलशनाको खोजीबारे जिज्ञासा राख्दा उनले भनेका थिए , गुलशनालाई छिमेकी जिल्लामा पु¥याइएको सुराग आएको छ । हामी निकै नजिक पुगिसकेका छौं । चाडै बालिकाको उद्धार गर्छौ । तर दुर्भाग्यवश बालिकाको जीवित उद्धार गर्न प्रहरी असफल भएको छ ।
बालिका मृत भेटिएपछि नायव प्रहरी उपरीक्षकसँग सोधियो – चाडै उद्धार गर्छौ भन्नुभएको थियो , बालिकाको सडेगलेको शरीर फेला प¥यो त ? उनले उत्तर दिंदै भने एक व्यक्तिले हामीलाई बालिका धनुषामा देखिएको सूचना दिएका थिए । पछि हामीले उनलाई बोलाएर बालिकाको तस्बिर पनि देखाएर सोध्दा–“ हो – मैले यही बालिकालाई एउटा केटासँग धनुषामा देखेको बताएका थिए । ” हामीले रौतहटसम्म घेराबन्दी गरेका थियौं । तर सूचना गलत निस्क्यो । प्रहरी नायव उपरीक्षक बाखुले अब अनुसन्धान तहकिकातमा कुनै कसर बाँकी नराख्ने र अपराधी पत्ता लगाएरै छोड्ने बताएका छन् ।
छोरीको लास फेला परेको खबरले आमा जाहेदा खातुन र उनका परिवार स्तब्ध छन् । आमा जहेदा इन्तु न चिन्तु भएकी छिन् । गोबिन्दपुर गाउँ नै शोकाकुल भएको छ । उनले प्रहरीले आफु र आफ्नो परिवारलाई गुमराहमा राखेको आरोप लगाइन् । उनले भनिन् , बालिका भेटि सकिएको छ , चाडै घर ल्याइदिन्छौ भनेर आश्वासन दिएका थिए । तर अहिले सग्लो लास पनि दिन सकेनन् । प्रहरीले बालिकाको खोजीमा मेहनत गरेको भए आफ्नी छोरी जीवितै भेटिन्थ्यो भन्दै उनले प्रहरीले वास्तै नगरेको आरोप लगाइन् ।
मृत गुलशना खातुन स्थानीय सामुदायिक विद्यालयमा कक्षा ४ मा अध्ययनरत थिइन् । त्यस अघि उनी स्थानीय मदर्सामा पढथिइन् ।
