सुरुमा कतिले उनलाई पागल भने । कतिपयले ‘हिन्दु राज्य फर्काउन’ अभियान चलाइरहेको आरोप लगाए । कतिले गाई तस्करी गर्ने गरेको आरोप पनि लगाए । यी सबै आरोपहरूलाई नजरअन्दाज गर्दै ६१ वर्षीय आरबी न्यौपाने विगत लामो समयदेखि सडकमा छाडा छोडिएका गाई–बाच्छाको उद्धार र संरक्षणमा सक्रिय छन् । उनी पशु अधिकारकर्मी हुन् ।
२०७१ सालयता ‘मठमन्दिर गाईबाच्छा बचाऊ तथा समाज विकास अभियान’को अध्यक्षका रूपमा उनले गाईवस्तुको उद्धार र संरक्षण कार्य अघि बढाइरहेका छन् । गाई गोरुको स्याहारमा उनी आफ्ना सहयोगी र शुभचिन्तकसहित अहोरात्र खटिने गर्छन् ।
पशुपतिनाथ मन्दिर नजिकैको गौशालामा अहिले १५३ वटा गाई गोरु छन् । काभ्रेको बेथानचोक र नमोबुद्धमा पनि यस अभियानले गौशाला सञ्चालन गरिरहेको छ । गाई, गोरु र बाच्छा–बाच्छीको संरक्षणमा लाग्दा न्यौपानेले अनेकौँ समस्या र चुनौती भोग्नुपरेको छ ।
न्यौपाने दैनिकरुपमा सडकमा गएर बेवारिसे गाईको उपचार पनि गर्छन् । गाई संरक्षणमा लाग्दाको खुसी र चुनौतीबारे रातोपाटीसँग उनले आफ्नो अनुभव यसरी साटे :
